İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Standartlaşdırma İnstitutu (AZSTAND) tərəfindən beynəlxalq standart əsasında AZS ISO 22716:2023 “Kosmetika – Yaxşı istehsal təcrübələri (GMP) – Yaxşı istehsal təcrübələrinə dair təlimatlar”  dövlət standartdı qəbul edilib.

Dövlət standartı Azərbaycan Respublikasının Prezidenti tərəfindən ilin əvvəlində təsdiqlənən “Milli standartlaşdırma sisteminin beynəlxalq tələblərə uyğunlaşdırılmasına dair 2023-2025-ci illər üçün Dövlət Proqramı”nın icrasından irəli gələrək hazırlanıb.

Bu standart özündə kosmetika vasitələrinin istehsalı, nəzarəti, saxlanması və daşınması üzrə təlimatları ehtiva edir.

8 mart Beynəlxalq Qadınlar Günü ərəfəsində qəbul edilən dövlət standartı xanımların yüksək keyfiyyətli, beynəlxalq standartlara cavab verən kosmetika məhsulları ilə təmin edilməsinə şərait yaradacaq.